السبوبه
مصطلح جديد بيتقال عالمصلحه او بمعني اصح طرق الكسب السريعه الغير مشروعه!!
طب هو احنا هنعمل ايه يعني ما الدنيا صعبه ولازم السبوبه علشان نعيش
وبعدين انتا مين قالك انك السبوبه حرام ولا غلط!!!
ماهي ممكن تكون زيها زي السمسره و السمسره حاجه عاديه و مشروعه
هقولك انا معاك ان الدنيا بقت صعبه وانك تحاول تعمل اي حاجه جنب شغلك تكسب بيها دخل اضافي علشان تحسن من وضعك المادي دي حاجه طبيعيه
بس اللي مش طبيعي انك تتعامل مع الربا علي انه سبوبه
تتعامل مع العموله اللي مش من حقك علي انها سبوبه
تتعامل مع ضرب الفواتير علي انها سبوبه
تتعامل مع الرشوه علي انها سبوبه
تتعامل مع ان وضعك فالشغل يسمحلك انك تعدي حاجات مقابل شويه فلوس علي انها سبوبه
تتعامل مع النصب والفهلوه علي انها سبوبه
تتعامل مع اللي محتاج خدمه منك وانك تاخد مقابل ليها مع انك المفروض تعملها ببلاش علي انها سبوبه
تتعامل ف انك تغلي ف سعر سلعه عندك وانتا محتكرها علي انها سبوبه
فيه حاجات كتير اوي بقت موجوده فحياتنا تحت بند السبوبه و بقينا نتعامل معاها عادي كنوع من المكسب المشروع
بس اللي سياتك متعرفوش ان اي حاجه بتخالف فيها ضميرك وتحاول تضحك عليه و تعدي هو مش بيعدي وبيتكتبلك وبيلف ويرجعلك تاني فخليك امين في كل تعاملاتك لان الخير دايره كبيره وبتلف والشر دايره كبيره وبتلف برده وكله هيرجعلك بطريقه مباشره او غير مباشره!!!
تعليقات
إرسال تعليق