جواز ولا مصلحه !!

بعض الاهالي ينظرون للزواج علي انه مصلحه يعني بمعني اصح مش بيبصوا علي سعاده بنتهم فعيشتها مع الشخص ده قد ما بيبصوا علي العريس او الزبون اللي جاي يشيل معاه كام والمستوي اللي هيعيش بنتهم فيه!! طبعا مش كل الناس كدا

بغض النظر عن اخلاق العريس و هو بيتعامل ازاي مع البنت دي و هو شايفها ازاي 

شايفها علي انها سلعه ترفيهيه هو بيشتريها بفلوسه ولما يزهق يرميها ويجيب غيرها برده بفلوسه

ف ياريت كل الاهالي تبقي واخده بالها من النقطه دي كويس و تقدر الموضوع ككل علي انه بدايه حياه جديده بين طرفين بيقدروا بعض وبيحترموا بعض واهم من ده كله يكونوا عارفين ان الجواز ده عباره عن ميزان كل كفا فيه لازم تكون اد التانيه بالظبط علشان لو واحده مالت عمر الدنيا ما هتكون سعيده، وكمان متحاولوش تضغطوا علي بناتكم انهم يتجوزوا ده او ده بحجه انكم عارفين مصلحتهم كويس اكتر منهم و سيبوهم هما اللي يختارو شريك حياتهم المناسب

لان الفلوس مش كل حاجه

فيه حاجات تانيه اهم بكتير من الفلوس خصوصا فالارتباط و الجواز

زي مثلا ان لازم الاتنين يكونوا متقاربين في المستوي الفكري والمستوي الاجتماعي

يكونوا بيقدروا و بيحترموا خصوصيات بعض

يكونوا عارفين يستحملوا بعض وقت الخنقه والضيقه

يكونوا عارفين يسمعوا بعض كويس من غير تذمر دائم او اعطاء اوامر 

لان السعاده والجواز الناجح مبتجيش ابدا من طرف واحد

لازم يكونوا الطرفين بيساعدوا بعض فكل حاجه علشان كفه الميزان تفضل مظبوطه طول العمر

وعلشان ده يتحقق لازم يكون الاختيار بحريه الطرفين 

علشان الحياه تمشي بسعاده و ميحصلش زي ما بنسمع الايام دي ان الاتنين مكملوش سنه وسابوا بعض 

او ان الراجل بيمد ايده علي مراته 

او ان الزوجه بتخون جوزها علشان مش طايقه تعيش معاه وتتعامل مع اسلوبه وطريقته

كل المشاكل دي بتبدا من اول نقطه وهي الاختيار

فلازم يكون الاختيار صح من الاول علشان هيترتب عليه كل  حاجه بعد كده